اربعيني في قلب صغيره

اسكربت 
اربعيني في قلب صغيرة 
كامل
والله انا لو منك مفرحش اوي كدة ان مكنش يعني اكبر منك بكتيير اوي
قالت كدة زينة لهمس جارتها وصحبتها الوحيدة وهما قاعدين علي سلم العمارة وهمس وقتها ملامحها بهتت وابتسامتها اختفت وهي بتبص لزينة 
ده علي اساس اني من حقي اني اختار انا اه ممكن ارفض بس يعني ده هو الوحيد اللي اتقدملي من بعد ما ذياد دخل السچن ومش هنكر ان العريس ده فعلا كبير عني بكتير بس هعمل ايه انا مش عايزة اسمع تلسين حد عليا وكفايا انهم واخديني بذنب ذياد اخويا

زينة زعلت من نفسها بسبب اندفاعها والكلام اللي قالته لهمس فقالتلها بندم
حقك عليا يا همس انا بجد مقصدش اللي قولته
ابتسمت همس بحزن وردت علي زينة وهي بتقوم من مكانها 
ولا يهمك يا زينة انا عارفة انك متقصديش ده انتي صحبتي الوحيدة يلا هطلع انا بقي لامي احسن تستعوقني ومتنسيش تيجي بكرة
ابتسمت زينة وردت بلهفة وهي بتقوم من مكانها 
ايه ده يا بت هو انا محتاجة عزومة اكيد طبعا هاجي ومن بدري كمان عشان ازوقك بايدي والبسك فستان الفرح الا صحيح يا بت يا همس هو انتي شوفتي العريس ده 
سرحت همس بخيالها بعيد وهي بتفتكر لما جه يتقدملها وهي اللي فتحتله الباب ووقتها انبهرت بشكله وكاريزمته وخصوصا انه كان كلاسيك اوي في مظهره وده عجبها اوي بس عمرها ما تخيلت انه يكون جاي عشان يخطبها انتبهت همس لصوت زينة وهي بتقولها باستغراب 
ايه يابنتي روحتي فين بقالي ساعة بكلمك
اتنهدت همس وردت وهي بتطلع السلم 
هستناكي بكرة يا زينة اوعي تتأخري عليا
دخلت همس لامها المطبخ وشافتها وهي واقفة بتقلب الاكل عالنار واول ما لمحتها نسرين امها ابتسمت وهي بتقول بحب 
اهلا بعروستنا القمر اللي مبتزهش من قاعدة السلالم والرغي مع صحبتها
ضحكت همس وردت بحب وهي بتقرب من نسرين وباستها من خدها وهي بتقولها بحب 
يعني هو انا بعمل حاجة غير اني اقعد عالسلم يا ماما وبعدين خلاص كلها انهاردة وهمشي ومش هتلاقي حد تزعقي فيه