اسكريبت بقلم اسراء جمال

في نقاشات ملهاش لازمة مخي مشغول مش فايقة للحاجات دي فضلنا ماشيين لحد ما وصلنا لعمارة..شكلها مش ألطف حاجة بس أنا كنت فاصلة تماما وبتمنا لو حتى أنام على الأرض..!
_شقة حضرتك في الدور الخامس اللي عاليمين.
طيب تمام فين الشفرة
_شفرة إيه
شفرة الأسانسير.
ضحك وبصلي پشماتة وقال
_هه لأ ماهو مفيش شفرة ولا فيه أسانسير أصلا.

أمال هطلع إزاى
_مش شايفك متكسحة يعني عندك رجلين زيك زينا والله عادي.
إنت إنسان قليل الذوق.
ومشيت وسيبته وقعد ينادي عليا بس معبرتوش أكيد عاوز يعتذر عن قلة ذوقه معايا خليه ينادي من هنا لبكرا مش هرد عليه.
طلعت الخمس أدوار بعد ما روحي راحت وروحت عند الشقة اللي شكلها ميديش أمل تماما ووقفت قدام الباب!
لحظة أنا مخدتش المفتاح منه!!
فضلت مستنية أكيد هيطلع يطلعهولي بس للأسف إستنيت كتير و مطلعش!
اضطريت أنزل بعد ربع ساعة أول ماشافني سمعت صوت ضحكته فتحت إيدي من غير رد حسيت كإن إزازة ماية متلجة وإترمت عليا!
_خدي ماهو لو نسمع الكلام ونرد عالناس ومناخدش في وشنا مكنش ده بقى حالنا رحلة سعيدة ياااا رنا هانم.
خدت المفتاح ومشيت بكل عصبية العالم من غير ولا حرف بس سمعت صوته بينادي
_تسعة بالدقيقة تكوني موجودة قدام العمارة.
طلعت ولا كإن سمعت حاجة بعد ما كنت قربت أفطس من السلم مرتين دخلت الشقة ولقيت أكل على ترابيزة محطوطة جوا كلت ودورت على أقرب سرير ونمت نوم عميق على عكس ما كنت متوقعة إنه مش هيجيلي نوم بس اللف طلع عيني..مش عارفة إيه متاهة عالم سمسم اللي وقعت فيها دي!
منك لله يا عم إبراهيم والله لاجيب حد جديد مكانك.
صحيت وفطرت من الأكل اللي كان موجود قررت أتاخر نص ساعه عن الساعة ٩ علشان يبقى يتعامل بقلة ذوق حلو أوي وطبعا عرفت الساعة من الساعة اللي لقيتها عالترابيزة محطوطة علشان ألبسها رغم كرهي الشديد للبس الساعات وهما للأسف مانعين عني كل الموبايلات...نزلت بس الغريبة مالقيتهوش واقف فضلت واقفة ولحسن حظي قابلت أول صديقة عرفتها هنا وقفت معاها وإتكلمنا كتير وجه بعد نص ساعة وأنا كنت بغلي.
_طبعا كنت متوقع منك تتأخري عن المعاد وقفت بعيد ولما لقيتك منزلتيش غير بعد نص ساعه مشيت ورجعت بعد نص ساعة كما تدين تدان المواقف لما بتترد مبتزعلش أعتقد.
صدقني حساب اللي بتعمله ده غالي وغالي أوي كمان.
مردش عليا ومشي وشاورلي أمشي وراه ودعت صاحبتي اللي كنت أتمنى لو الفرصة تسمحلنا نتقابل تاني. كان ماشي بسرعة جدا هو لو حد باعته ينتقم مني يقولي ماهو أكيد مزقوق عليا مش معقول يعاملني المعاملة دي وبابا عارف!
مشينا مسافة طويلة جدا وروحنا مكان غريب مختلف تماما عن اللي فات.
_رنا أنا هسيبك هنا عارف إن كنت قليل الذوق معاكي بس صدقيني هتفهمي السبب في الوقت المناسب خلي بالك من نفسك كويس أوي إنتي مجتهدة وشاطرة بس مفيش مانع من الحرص ناقصلك تلات لمبات لو نوروا هترجعي مكانك تاني وأنا بقدر أتابع كل حاجة من خلال القلم ده لو احتاجتي أى حاجة بصيله واتكلمي هتلاقيني جيتلك...سلام.
إتطمنت أوي لما قال كده حسيت إنه مش لوحدي وفيه حد معايا يطمني أوقات بنحتاج نحس بالاطمئنان حتى لو من شخص غريب!
أوقات كل اللي بنحتاجه حد يقول أنا فاهمك من غير ما نضطر لشرح وتبرير كتير!
مشيت في المكان الجديد اللي كان عكس القديم كان مكان راقي جدا كان فيه شجر كتير أوي وبحيرات كتير كان الشجر فيه تفاح أحمر زاهي كان المكان